കൊച്ചി: പെരുമ്പാവൂര് കോടനാട് അഭയാരണ്യം (കപ്രിക്കാട്) ഇക്കോ ടൂറിസം കേന്ദ്രത്തില് കഴിഞ്ഞ 16 മാസത്തിനുള്ളില് സന്ദര്ശനത്തിനെത്തിയത് രണ്ടുലക്ഷത്തോളം സഞ്ചാരികള് . കോവിഡ് മൂലം കേന്ദ്രം അടച്ചതിനുശേഷം കഴിഞ്ഞ വര്ഷം ഫെബ്രുവരിയില് തുറന്നത് മുതലുള്ള കണക്കാണിത്. മുന്വര്ഷങ്ങളെ അപേക്ഷിച്ച് നോക്കുമ്പോള് സഞ്ചാരികളുടെ എണ്ണത്തില് കാര്യമായ വര്ധന ഇക്കാലയളവില് ഉണ്ടായിട്ടുണ്ട്. അതിനനുസൃതമായി വരുമാനവും കൂടി. ഏകദേശം 55 ലക്ഷത്തിലധികം രൂപയാണു വരുമാനമായി ലഭിച്ചത്.
1.75 ലക്ഷത്തോളം മുതിര്ന്നവരും 25,000ഓളം കുട്ടികളുമാണ് ഇവിടെ എത്തിയത്. ആഭ്യന്തര സഞ്ചാരികളാണ് ഇതില് ഏറെയും. സഞ്ചാരികളുടെ എണ്ണത്തിലുണ്ടായ വര്ധന ഏറെ ആശാവഹമാണെന്ന് അഭയാരണ്യം അധികൃതര് വ്യക്തമാക്കി. എറണാകുളം ജില്ലയിലെ പ്രധാന ഇക്കോ ടൂറിസം കേന്ദ്രമായ അഭയാരണ്യത്തിലെ മുഖ്യ ആകര്ഷണങ്ങള് ആനകളും, മ്ലാവുകളും, പുള്ളിമാനുകളും, ചിത്രശലഭ പാര്ക്കും, ഔഷധ സസ്യങ്ങളുടെ ഉദ്യാനവും, പുഴയോട് ചേര്ന്നുള്ള നടപ്പാതയും, ഏറുമാടങ്ങളും, കുട്ടികള്ക്കുള്ള ചെറിയ പാര്ക്കുമാണ്. പെരിയാറിന്റെ തീരത്ത് അഞ്ചേക്കറില് സ്ഥിതിചെയ്യുന്ന അഭയാരണ്യം ടൂറിസം കേന്ദ്രം വനംവകുപ്പിന്റെ കീഴിലാണ്.
മുതിര്ന്നവര്ക്ക് 30 രൂപയും കുട്ടികള്ക്ക് 20 രൂപയും വിദേശികള്ക്ക് 250 രൂപയുമാണ് അഭയാരണ്യത്തിലെ പ്രവേശന നിരക്ക്. രാവിലെ എട്ടുമുതല് വൈകുന്നേരം അഞ്ചുവരെയാണ് പ്രവേശനം. തിങ്കളാഴ്ച ദിവസം അവധിയാണ്. കോടനാടുനിന്ന് രണ്ടുകിലോമീറ്റര് അകലെയാണ് അഭയാരണ്യം.
